აფხაზეთისა და ცხინვალის რეგიონებში მცხოვრები მოსახლეობისათვის შექმნილია საზღვარგარეთ სწავლის გაგრძელების და საერთაშორისო საგანმანათლებლო და გაცვლით პროგრამებში მონაწილეობის შესაძლებლობები.

აღნიშნული პროგრამების ფარგლებში, აფხაზეთის და ცხინვალის რეგიონებში მცხოვრებ მოსწავლეებს, სტუდენტებსა და მეცნიერებს აშშ-ის, ევროპის და აზიის უნივერსიტეტებში სრული ან/და ნაწილობრივი დაფინანსებით სწავლის გაგრძელებისა და სამეცნიერო საქმიანობის განხორციელების შესაძლებლობა ეძლევათ. ამასთან, აღნიშნულ უნივერსიტეტებში სწავლისთვის შექმნილია დაფინანსების/სტიპენდიის მოპოვების შესაძლებლობები. 

საზღვარგარეთ სწავლის გაგრძელების გზები:

1. საქართველოს უნივერსიტეტებში სწავლა

საქართველოს უნივერსიტეტებში ჩარიცხულ სტუდენტებს შესაძლებლობა აქვთ ისარგებლონ მათ უნივერსიტეტსა და წამყვან ევროპულ, აშშ-ის ან აზიის უნივერსიტეტებს შორის უკვე დამყარებული თანამშრომლობით და მის ფარგლებში მონაწილეობა მიიღონ საერთაშორისო საგანმანათლებლო და გაცვლით პროგრამებში. აღნიშნული პროგრამები განსხვავდება უნივერსიტეტების მიხედვით.

2. Erasmus+ პროგრამაში მონაწილეობა

Erasmus+ არის ევროკავშირის პროგრამა განათლების, ახალგაზრდობისა და სპორტის მიმართულებით. ევროკავშირში ინტეგრაციის პროცესიდან გამომდინარე, საქართველო უფლებამოსილია მონაწილეობა მიიღოს მის სხვადასხვა სფეროებსა და საგრანტო კონკურსებში.

Erasmus+ პროგრამა, ერთი მხრივ, შესაძლებლობას უქმნის საქართველოს უნივერსიტეტებს ინსტიტუციური თანამშრომლობა დაამყარონ ევროპულ უნივერსიტეტებთან, მეორე მხრივ კი ითვალისწინებს გაცვლით პროგრამებს, უმაღლესი საგანმანათლებლო დაწესებულების სტუდენტებისთვის ცოდნის გაღრმავების და აკადემიური/ადმინისტრაციული პერსონალისთვის კვალიფიკაციის ამაღლების მიზნით.

პროგრამა სტუდენტებს საშუალებას აძლევს კონკურსის წესით ჩაერთონ ერთობლივი სამაგისტრო პროგრამებში ან  მოკლევადიან (2 – 12 თვე)  გაცვლით პროგრამაში, ისევე როგორც მონაწილეობა მიიღონ ჟან მონეს აქტივობებში, რაც გულისხმობს ევროკავშირის შესახებ სასწავლო პროგრამებისა და კვლევითი პროექტების შემუშავებასა და განხორციელებას.  

ახალგაზრდებს აფხაზეთისა და ცხინვალის რეგიონებიდან, რომლებიც სწავლობენ საქართველოს უნივერსიტეტებში, შესაძლებლობა აქვთ მონაწილეობა მიიღონ ერასმუს+ ერთობლივ სამაგისტრო პროგრამაზე.

დამატებითი ინფორმაციისთვის იხილეთ - http://erasmusplus.org.ge.

საკონტაქტო ინფორმაცია - (+99532) 2147139.

3. საერთაშორისო უნივერსიტეტში სწავლა და დაფინანსების მოპოვება

აფხაზეთისა და ცხინვალის რეგიონებში მცხოვრებ ახალგაზრდებს შესაძლებლობა აქვთ, საკუთარი სურვილისამებრ, თავად მოიძიონ მსოფლიოს სასურველი უნივერსიტეტები,  მათ მიერ გამოცხადებული სასტიპენდიო პროგრამები და დამოუკიდებლად მიიღონ მათში მონაწილეობა. 

ამ მხრივ, შესაძლოა გამოყენებულ იქნას შერიგებისა და სამოქალაქო თანასწორობის საკითხებში სახელმწიფო მინისტრის ვებ-გვერდი, სადაც მუდმივად ახლდება ინფორმაცია მიმდინარე საერთაშორისო სასტიპენდიო პროგრამებისა და გახსნილი შესაძლებლობების თაობაზე - https://smr.gov.ge/ge/page/50/ganatleba-sazgvargaret.

საერთაშორისო უნივერსიტეტში წარმატებით ჩარიცხვის და სრული ან ნაწილობრივი დაფინანსების საჭიროების შემთხვევაში, აფხაზეთის და ცხინვალის რეგიონში მცხოვრებ ახალგაზრდებს შეუძლიათ მიმართონ სსიპ - განათლების საერთაშორისო ცენტრს https://iec.gov.ge/.

ყოველწლიურად გამოცხადებული კონკურსის ფარგლებში, ცენტრი განიხილავს საზღვარგარეთ სწავლის მსურველი პირის განაცხადს დაფინანსების სრულად ან ნაწილობრივ მოპოვების თაობაზე. დაფინანსება გულისხმობს სწავლის საფასურის ან/და სწავლის პერიოდში საზღვარგარეთ ცხოვრებასთან დაკავშირებული ხარჯების ანაზღაურებას.

განაცხადების მიღება წარმოებს ელექტრონულად ცენტრის ვებგვერდზე განთავსებულ სარეგისტრაციო სისტემის მეშვეობით - https://app.iec.gov.ge/.

განათლების საერთაშორისო ცენტრის კონკურსში მონაწილეობისთვის აფხაზეთისა და ცხინვალის რეგიონებში მცხოვრებ პირებს შეუძლიათ გამოიყენონ:

• საქართველოს მოქალაქის პირადობის დამადასტურებელი დოკუმენტი; ან
• ნეიტრალური პირადობის მოწმობა ან ნეიტრალური სამგზავრო დოკუმენტი.

ამასთან, მნიშვნელოვანია, ახალგაზრდას განხორციელებული ჰქონდეს აფხაზეთსა და ცხინვალის რეგიონებში მიღებული უმაღლესი განათლების აღიარება.

დამატებითი ინფორმაციისთვის იხილეთ - https://iec.gov.ge/.

საკონტაქტო ინფორმაცია: (+995 32) 2970197